Este mes o Eco-reto de Voz Natura foi sobre a reutilización de materiais. Por este motivo, no cole elaboramos os nosos adornos para a árbore de Nadal con material reutilizado.
Podedes ver que empregamos de todo: tubos de papel hixiénico, botellas de plástico, paus, CD's, cápsulas de café... A imaxinación non ten límites.
E dende aquí aproveitamos para desexarvos... Bo Nadal!
Chegou o frío e aproveitamos para plantar algunhas cousiñas que resistan as temperaturas máis baixas que están chegando.
No horto e relacionado co Proxecto de Voz Natura, plantamos allos, chícharos e tirabeques, e a partir de 3º de primaria sacaron a semente do tomate para preparalas de cara á primavera.
Tamén aproveitamos que todavía quedaban follas caídas para recollelas e facer unha manta coa que tapar os novos cultivos e que desta forma garden mellor a calor e poidan medrar con máis facilidade.
Se queredes ver as fotos completas do día na horta, premede nesta imaxe:
Onte todo o cole volveu sair á nosa horta para comezar a plantar especies de inverno. Pensaredes que imos un pouco adiantados, pero ainda que todavía estamos en outono o frío xa está chegando e precisamos plantas que aguanten temperaturas máis baixas.
Por este motivo os cativos de infantil e 1º e 2º, colleron parte do compost que tiñamos no composteiro para peneiralo e poder fertilizar a terra onde posteriormente plantaron tulipáns, iris e transplantaron unhas poucas fresas que quedaran do mes pasado.
Pola súa banda, os grupos de 3º a 6º de primaria estiveron a comprobar o pH da terra do horto coa escala do pH da lombarda antes de sementar. Así puideron observar os diferentes tipos de pH dende os máis ácidos aos máis básicos con: vinagre, Coca-Cola, terra, lixivia de cinza e lixivia común.
Podedes premer na foto para ver todas as fotos desta actividade do Proxecto de Voz Natura. 📸
Dende o outono pasado tivemos en acollida sete árbores autóctonas. Cada clase ocupouse dos coidados da súa árbore ata que este curso xa estiveron listas para a súa plantación no noso monte.
Por este motivo, esta semana (coincidindo co día internacional
do patrimonio mundial) e en relación co Proxecto de Voz Natura no que participa o centro, fumos ao monte Vixiador a plantar as nosas árbores
autóctonas.
Para poder levar a cabo esta actividade contamos coa
colaboración da Comunidade de Montes de Candeán que nos facilitou as árbores e
preparou o terreo para a plantación. Aos que dende aquí damos as grazas e
agardamos seguir colaborando en futuros proxectos medioambientais.
Chegado o día da plantación, comezamos cun roteito de
recoñecemento de árbores polo parque forestal. Buscamos as árbores máis
significativas, identificamos as súas follas… e en definitiva investigamos na
natureza.
Previamente, no cole, cada aula identificou a súa árbore e
preparou unha pequena presentación coa que homenaxeala no momento da plantación.
Ademais, para que todos os que pasen por alí saiban que árbores son as que
temos plantadas, o noso conserxe Cibrán preparou uns letreiros identificativos en
madeira co nome de cada árbore e o curso que se encargou de plantala. Polo que
tamén temos que agradecerlle a Cibrán a súa colaboración.
Xa vedes que todos colaboramos nesta actividade. E iso é
precisamente o que queremos que fagades vos, indo de cando en cando a visitar
as nosas árbores, coidar que teñan o espazo limpo… Para que de aquí a moitos
anos teñamos unhas árbores fermosas e fortes.
Se queredes ver a galería completa podedes premer na foto:
O pasado venres 5 de novembro os grupos de 1º e 2º de primaria foron de visita ao zoo, onde traballaron a educación ambiental a través de distintas actividades lúdico-educativas. Tan ben o pasaron que o tempo se lles pasou voando!
Puideron ver todos os animais que hai no zoo e coñecer a historia que hai detrás de cada un deles.
Ademais, tiveron a gran sorte de participar en actividades que se deixaron de realizar por mor da pandemia e que xa é posible volver a facer como subir á casa da árbore, ver os esqueletes dos animais e facer outros xogos propostos polo guía.
Pero mellor que contalo é poder miralo, así que premendo nesta imaxe podedes acceder á galería completa:
Aproveitamos para dar as grazas aos guías que nos acompañaron nestas actividades polo seu trato, amabilidade e a paixón que nos transmitiron no coidado dos animais e a natureza.
Está a piques de rematar o mes de outubro e, como sabedes, durante este mes tiñamos o reto de limpar un recuncho da natureza na nosa contorna.
Esta idea forma parte dos "Eco-Retos" de Voz Natura e podemos dicir que temos o reto... SUPERADO!
Moitas grazas a todos os que colaborastes tamén dende as vosas casas limpando os montes, praias e demáis espazos naturais polos que pasastes.
Sabemos que é importantísimo que todos colaboremos para acadar un mellor futuro para o noso planeta.
Veremos a ver cal é o reto do próximo mes, estade moi atentos para que o poidamos superalo tan ben como nesta primeira proposta.
Aquí vos deixamos un par de fotos do grupo que máis metros limpou no cole:
Seica fai tempo que non tiñades noticias do que está a facer Candeanina polo cole. Pois traémosvos novidades: Esta semana puxemos a punto a nosa horta escolar!
Todos os grupos, dende os máis cativos ata os máis maiores, colaboraron para que o invernadoiro e o campiño que temos estén listos para producir novos cultivos. Estas accións están incluidas tamén dentro do Proxecto de Voz Natura no que participamos.
Ademáis, retiramos os amorodos que quedaban do curso pasado e os levamos a casa nunha maceta para poder recoller os froitos cando comecen a medrar e madurar.
Que novas plantacións teremos este ano? Pronto o descubriredes. 😉
Mentres tanto, aquí podedes ver as fotos desta semana na nosa primeira sesión de horta.
